محمود الديدامونى Admin
المساهمات : 13 تاريخ التسجيل : 07/02/2008
| موضوع: القلب النونو للشاعر علاء عيسى الخميس فبراير 14, 2008 11:56 am | |
| " 1 " البنت ام عيون سرحانة بتركُّز دايما فى خيالها وتَّدور على أقرب " سوبر ماركت " للأحاسيس وماتلقاش غير حبة أحاسيس منباعة لناس من غير أحاسيس فابترجع وبتكتب ع القلب النونو . مقفول . مش للبيع ماهو أكتر كلمة بتكرههاعنيها كلمة " بيع " فتعاود تانى عيونها السرحانة تركز فى خيالها
**************************
" 2 "
البنت الواخدة عنيها م الأرض خضارها وم البحر مداه وم السما تواهانها قادرة عنيها على رمى شباكها على كل عيون هاتبص عليها. البنت دَهيَّة تتمنى عيون تشبكها وتشبٍَكها وتشَبِّك روحها وتخطفها لدنيا بعيدة أبعد م السما . أوسع م البحر . أجمل من كل خضار فى الأرض فاتواجه روحها ف قلب الحلم فاتخاف من روحها ......... وتصحى فاتعاود تانى عيونها السرحانة تركز فى خيالها
" 3 "
البنت الحلوة عنيها لجل الناس بتخاصم روحها وتقطَّع شرايين أفكارها وبتنزف أحاسيس ع الأرض والناس . نفس الناس بتبص عليها وتصَّعب ولا حدش منهم فكَّر يمسك منديلة بطرف ايديه ويمسح دمعتها ولا كلِّف نفسه وقال معلهش ولا حتى استفسر ع اللى بيحصل . فابترجع وتطبطب على روحها وتصالح روحها . فتعاود تانى عيونها السرحانة تركز فى خيالها . | |
|