من قصيدة قلب طالع ع المعاش للشاعر محمود عبدالحفيظ

<1>
لما الجبل يعلى تغيب الشمس من قبل المعاد
يفلت حصان القلب خايف ..
من ضلام الليل .. ومن قهر البعاد
يفتح كتاب العشق .. يقرا ..
يمكن الشعرا – اللي ما فيه حد منهم ..
لما سافر تاني عاد.
يمسحوا الدمع ف عيونه ..
يلقى دا ودع هريرة ..
ودا على الأطلال بيبكي ..
ودا بيصرخ ع الجبل ، بانت سعاد !!
.....................
الدقة دى اللى ف قلبى مش دقة حياة
وانا يستحيل ..
بعد الرايات الحمرا أرفع راية بيضا وارتمي..
أو خلف أسواري القديمة أحتمي ..
أو كلما جف الصهيل ..
أجتر أحزاني واقول حان الرحيل ..
واندس في جحر الكلام والجعجعة
دي معمعة ..
ترضى ما ترضى لك مكانك ع الطريق
وما دمت ما نزلتش غريق ..
ممكن تعيش ..
لازم تعيش
وما دمت فارس ..
إوعى ييجي الليل يشوف ..
أحلامك الخضرا حزينة مدمعة
.......................
وما دمت من جدرك ما يقدرش الزمن يوم يقلعك ..
أو يبلعك
حترد فيك تاني الحياة..
وعلى اللي خانوك السلام
حتعيش كمان سنتين تلاتة في الضلام ..
ياما ليالي ع القمر بتفوت ..
وياما بينحبس في القلب والحلق الكلام
...................
مين اللي قال الدمع في عيونك يعيبك ؟
مين اللى قال ان الزمن مش راح يجيبك ؟
مين اللى قال ان الجناح ..
مهما يفيض بيه التعب مش راح يسيبك ؟
مين اللى قال ان الحبيب ..
لمَّا الحياة تدهس عليك ..
وتمد له بين السما والأرض جنة ..
يفتكرلك أي حاجة عملتها ويفضل حبيبك ؟؟!!
....................
شد حيلك ترجع الشمس اللي غابت
الحبال الدايبة سابت
والسهام الطايشة خابت
والبلاد اللي ما عمرك عبت فيها ياما عابت
لكن القلب اللي جواك لسه عايش
لسه طلقة ..
طلقة واحدة خلي بالك ..
من يمينك .. من شمالك
طلقة واحدة وبعدها .. يا إما طابت
تبقى صابت ..
يا العمى .. وساعتها ما تعرف دي شابة ..
ولَّا شابت ...
.....................
طلقة واحدة ..
والديابة كتيرة ع السكة بتعوي ليل نهار
والعيون اللي انت قلت تونِّسك ما لهاش قرار
مرة لسة صغيَّرة ..
مرة انا متحيَّرة ..
مرَّة حبيتك .. ولكن ..
خايفة لايزيد العيار
طلقة واحدة وقلب واحد ..
والأمل بينك وبينه البحر والليل والتتار
تعمل ايه ؟؟؟؟؟
.......... ، ...... ، .......
هيَّ دي فيها اختيار ؟!!